A Asociación Rapa das Bestas e o Concello da Estrada acordaron modificar os horarios dos curros previstos para esta fin de semana en Sabucedo ante a vaga de calor que se agarda en Galicia.
A decisión foi adoptada este martes arredor das 13:30 horas, durante unha reunión mantida entre representantes da organización e do Concello, co obxectivo de garantir unhas condicións máis favorables tanto para os aloitadores como para o público asistente e os propios cabalos.
Deste xeito, o curro do sábado celebrarase finalmente ás 20:00 horas, mentres que os curros do domingo e do luns adiántanse ás 11:00 horas.
Con este cambio, a organización busca evitar as horas de maior incidencia da calor, nunha fin de semana na que as previsións meteorolóxicas apuntan a temperaturas especialmente elevadas.
A programación da Rapa das Bestas mantense sen máis cambios, quedando modificados unicamente os horarios dos curros.
