O Ministerio de Transportes e Mobilidade Sostible vén de licitar por 10,5 millóns de euros as obras de rehabilitación do firme da N-640 entre o Alto de Xindiriz e Caldas de Reis, unha actuación que abrangue 32 quilómetros desta estrada na provincia de Pontevedra. O Concello de Cuntis fíxose eco este mércores nas súas redes sociais da nota de prensa publicada polo Ministerio, na que se dan a coñecer os detalles dunha intervención de especial importancia para as comunicacións da zona.
En concreto, a actuación desenvolverase entre os puntos quilométricos 190 e 222 da N-640, nun tramo que atravesa a nosa contorna e pasa polos municipios da Estrada e Cuntis antes de chegar a Caldas de Reis.
O contrato sae a licitación cun importe de 10,5 millóns de euros, IVE incluído, e o correspondente anuncio publicarase proximamente no Boletín Oficial do Estado.
Renovación do pavimento
O obxectivo das obras é solucionar as deficiencias detectadas no pavimento, recuperar a capacidade funcional do firme e mellorar tanto a comodidade como a seguridade dos usuarios da N-640.
Os traballos previstos inclúen o fresado do firme existente e a colocación dunha nova capa de rodadura con mestura bituminosa. A profundidade do fresado e o tipo de mestura que se empregue dependerán do grao de deterioración que presente cada zona.
Nos puntos que se atopen en peor estado, a intervención será máis profunda. Nestes casos está prevista a demolición completa do firme e o saneamento da parte da explanada que se encontre danada.
Nas estruturas da estrada tamén se procederá, cando sexa necesario, á reposición das xuntas de dilatación despois dos traballos sobre o pavimento.
Sinalización e elementos de seguridade
A actuación non se limitará á renovación do asfalto. O proxecto contempla tamén a reposición da sinalización horizontal, o balizamento e os sistemas de contención que resulten afectados durante a execución das obras.
Segundo explica Transportes, con estas intervencións preténdese recuperar a capacidade portante e funcional do firme, manter un nivel de servizo adecuado e preservar as condicións de seguridade viaria.
Dentro dun plan estatal de 1.629 millóns
As obras da N-640 forman parte do Plan Extraordinario para a mellora dos firmes da Rede de Estradas do Estado, presentado o pasado 15 de abril polo ministro de Transportes, Óscar Puente.
O plan conta cun investimento global de 1.629 millóns de euros para actuar sobre a rede viaria estatal. Transportes sinala ademais que este programa se suma aos investimentos ordinarios en conservación e mantemento das estradas do Estado.
Neste sentido, o Ministerio cifra en 130,41 millóns de euros o investimento realizado desde xuño de 2018 na provincia de Pontevedra dentro do programa de conservación e mantemento da Rede de Estradas do Estado.
A licitación supón así o primeiro paso para unha actuación de considerable envergadura nunha vía fundamental para as comunicacións da comarca: 32 quilómetros da N-640 entre o Alto de Xindiriz e Caldas de Reis serán obxecto dunha importante renovación do firme.
