No informativo de hoxe repasamos a actualidade da comarca e da provincia con temas de servizos públicos, seguridade, educación, cultura e movementos sociais.
Abrimos coa campaña do SEAGA, que leva emitidas 6.000 notificacións para a limpeza de fincas, un 40% menos ca o ano pasado, e co prazo de 15 días para cumprir coa obriga. Visitamos tamén AGADEA, onde se presentaron 37 reloxos GPS intelixentes que reforzan a seguridade dos usuarios grazas ao programa Provincia +Inclusiva.
Adiantamos que mañá se decidirá a ubicación da carpa das Festas do Salmón e da Sidra, que será máis grande ca de 2025 e acollerá 18 postos. A nivel sanitario, a Xunta amplía os PAC ao sábado pola mañá co novo decreto publicado no DOG, reforzando a atención urxente en primaria e creando 211 novas prazas ata 2028 cun investimento superior aos 10 millóns de euros.
Na Estrada, a CIG convoca unha manifestación polo Día do Traballo este venres ás 12:00 desde a Praza do Mercado. O IES Antón Losada Diéguez celebra hoxe o último día de portas abertas para dar a coñecer a súa oferta de FP e educación para adultos. Ademais, xa están á venda as entradas para o ballet “O Lago dos Cisnes”, que chegará en novembro con solistas de Moldavia, Ucraína e Italia. E en Santiago, profesorado e alumnado mobilízanse de novo pola situación do ensino nunha protesta na Alameda.
Na sección de comarcas: a Garda Civil investiga dous veciños de Vigo por tráfico de substancias tras un control na AG-41 en Caldas; a Xunta inicia en Rodeiro as obras dos camiños da parcelaria de Val de Camba; Moraña contratará tres traballadores con fondos provinciais; Caldas reactivará o obradoiro “Os Camiños do Camiño” con 20 contratos; e a Deputación recomenda renovar tratamentos contra o mildio tras detectar as primeiras manchas nas viñas.
En deportes, A Estrada acolle hoxe a xornada do Campionato de Intercentros Penitenciarios, un proxecto que combina fútbol, formación e reinserción social. Incluímos a charla con Manolo García, presidente do Comité Galego de Adestradores e director da Escola Galega de Adestradores da RFGF.
