A Galería de Verán · Venres 21 de agosto de 2026
Programa completo de A Galería de Verán, o magazine das mañás de Radio Estrada 107.7 FM.
Neste venres 21 de agosto repasamos a actualidade máis próxima da Estrada e da comarca, botamos unha ollada ás propostas da fin de semana e acompañamos a mañá con música, curiosidades, efemérides e participación dos oíntes.
Hoxe recibimos a Mónica García Goldar, presidenta da Asociación Conciencia Galicia, para coñecer mellor o traballo da entidade, os seus obxectivos e as actividades que desenvolve. Falamos tamén da reutilización e da segunda vida dos obxectos e deixamos apuntada unha cita para setembro: a asociación prepara un novo mercadiño na Estrada, do que coñeceremos todos os detalles máis preto da súa celebración.
A mazá e a sidra estradenses son tamén protagonistas. Conversamos con Miguel Soto Albores, membro da Asociación Maceira e Sidra da Estrada, para saber como se presenta a colleita deste ano, que cantidade e calidade de mazá se agarda, o posible adianto da recollida e os efectos que está tendo a seca nas maceiras.
Con Miguel miramos ademais cara a Portugal. A asociación estivo o pasado 1 de agosto en Porto promocionando a Ruta da Sidra da Estrada, co obxectivo de abrir novas vías de colaboración e achegar a proposta estradense ao público portugués.
E, como cada mañá, non falta a música. Entre outras historias, recuperamos a figura de Demis Roussos e descubrimos a súa etapa anterior en Aphrodite’s Child, a formación de rock progresivo e psicodélico na que coincidiu con Vangelis. Tamén lembramos á Orquesta Mondragón, que esta fin de semana celebra os seus 50 anos de traxectoria cunha actuación en Noia.
Actualidade, entrevistas, música, lembranzas, curiosidades e moita conversa nun novo venres de agosto.
A Galería de Verán
Radio Estrada · 107.7 FM
A radio máis próxima, tamén no verán.
