O informativo de hoxe comeza cun símbolo que volve ocupar o lugar que lle pertence: a Farola da Praza de Galicia, un punto de referencia que non aparece en ningún plano oficial pero que toda a veciñanza utiliza para orientarse, quedar ou simplemente explicar onde está. Un deses elementos urbanos que non só existen: organizan a vida cotiá. Hoxe recupera presenza… e non precisa máis presentación. Benvida de novo, Farola!
A partir de aí, repasamos a actualidade da xornada con temas que marcan o pulso da vila e da comarca:
O achado do corpo dun home de 71 anos na rúa Pérez Viondi.
A avaría no camión-grúa que atrasa a montaxe da carpa da Praza do Consistorio, aínda que os prazos se manterán.
A fin de semana das tapas do salmón e a venda dos tickets da 52ª Festa do Salmón.
Novas actuacións de limpeza no casco urbano, hoxe na Carballeira de Melania.
A petición da Rapa das Bestas para instalar en Sabucedo a escultura retirada da Praza de Galicia.
O recurso dunha farmacia que frea a apertura da botica anexa de Oca.
A folga masiva do sector do metal, que segundo a CIG paralizou o 100% das empresas da comarca.
A 3ª Expo BAE de bonsái na Sala Abanca.
Na comarca, falamos do ERE anunciado por Nestlé en Pontecesures, do atraso no proxecto da parada de tren de Valga e das medidas urxentes en Silleda polo estado do ponte de Abades. Ademais, Caldas de Reis transforma o seu patrimonio natural nunha aula aberta pola Semana da Ciencia Sabi@ Caldas.
En deportes, destacamos o XII Trofeo de Ciclismo Concello da Estrada, a convocatoria de Iziar Barcala coa selección española sub-19 de bádminton e o curso oficial de adestrador que se celebrará en agosto.
